هلا والله .. شخباركم اخواني عساكم بخير ..
اسمحولي كنت مسافره وما كنت ادش المنتدى دايما .. ومثل ما عودتكم ان بين كل فترة احط لكم جزء من القصة وهذا الجزء الرابع انشاء الله يحوز على رضاكم ..


*+*+*+*+*+*+*+*+*+*+*+*+*+*+*+*+*+*+*+*+*+*+*+*+*+ *+*+*+*+*+*+*+*

زايد: سعيد اسمع .. سارة تحب واحد اسمه فواز .. فواز هذا واحد من أعز ربعي .. من يوم هم صغار ويحبون بعض , ومن خمس سنوات صارت لهم مشكله بين الأهل .. كان فواز يكلم سارة بالمسنجر .. ودخل عليها أخوها عمر الغرفه .. ويوم عرف انها تكلم فواز مسكها وضربها ضرب .. وطلع من البيت وجمع رباعته ومسكوا فواز وضربوه لين اغمى عليه .. ودوه المستشفى طلع فيه كسر في ايده وترقد في المستشفى ثلاث ايام .. ومن ذاك اليوم دايما عداوات بين عمر وفواز .. وللحين هالإثنين ما يكلمون بعض .. بس فواز للحين يحب سارة ومصمم أنه يتزوجها .. وأظن ان سارة بعد تحبه للحين ..

سعيد: الصراحه البنيه عجبتني .. وبنشوف شو بيردون علينا , إذا تباني باخذها وإذا ما تباني ترى البلاد متروسه بنات وباخذ غيرها ..

زايد: والله زين تسوي .. يزاك الله خير ..

(( في نفس اليوم .. الساعة 12:30 في الليل .. أم فواز تحاتي فواز .. تدق على تليفونه بس ما يرد عليها .. !!!!))

فاطمة ( أم فواز): يا ربيه .. ليش ما يرد علي ؟؟ هذي مش عوايده دايما اذا راح النادي يرد الساعة 12:00 واليوم تأخر نص ساعة !! .. والله خايفه يكون صارله شي !!

نواف ( ابو فواز): بسم الله عليه .. تعوذي من ابليس ولا تحاتين .. انشاء الله فواز مافيه الا كل خير .. تحصلينه الحين منشغل ويا ربعه وناسي تليفونه في السيارة ..

فاطمة(أم فواز) : أنا ما برتاح لين اشوف ولدي جدامي .. تعال تعال .. انت تعرف رقم ربيعه أحمد .. دق له واسأله ..

نواف ( أبو فواز) : صدق انج عنيدة .. انزين بدق له الحين (( اتصل ابو فواز لأحمد ......))

أحمد: السلام عليكم..

نواف ( ابو فواز) : وعليكم السلام والرحمه .. شخبارك أحمد عساك بخير .. وياك أبو فواز..

أحمد: الحمد لله انا بخير .. حياك الله ابو فواز .. خير انشاء الله ..!

نواف ( ابو فواز) : الخير بويهك .. أقول .. أنت في النادي ؟؟

أحمد: هيه في النادي والحين برجع البيت .. ليش عمي صاير شي ؟؟

نواف ( ابو فواز) : لا يا والدي ما صار شي بس ابغيك تقول لفواز أن يرجع البيت لأنه ما يرد على تليفونه واليوم تأخر ..

أحمد : فواز ؟؟ .. بس فواز اليوم ما يا النادي .. وندق له من العصر وهو ما يرد علينا !!!!....

نواف ( ابو فواز ) : شوووووو ؟؟؟؟ ... فواز مش معاكم في النادي ؟؟!!.. عيل وين راح !!..

أحمد : والله ما ادري .. هو وعدنا أنه ايي النادي اليوم بس ما يا !!...

نواف ( ابو فواز ) : أوكي مشكور يا اولدي .. بس اسأل ربعك يمكن أحد شافه!! وطمنونا عليه ..

أحمد: انشاء الله عمي .. يالله مع السلامه ..

نواف ( ابوفواز) : تسلم يا اولدي .. في حفظ الله.. مع السلامة ..

فاطمة( ام فواز ) : ها شو قال ؟؟

نواف ( ابو فواز) : يقول أن فواز ما يا النادي اليوم .. وهم يدقون له من العصر وهو ما يرد عليهم ..

فاطمة ( ام فواز ) : وي.. بسم الله على ولدي .. عيل وين راح ؟؟ .. وين ولدي الحين !! .. (( وبدت ام فواز المناحه .. صيااااااااااااااح ))

نواف ( ابو فواز) : .. حبيبتي ام فواز .. تعوذي من ابليس .. انشاء الله ولدنا مافيه الا العافيه .. وبيرجع البيت .. بس عاد أم فواز .. ترى دموعج غاليه علينا .. يالله قومي اغسلي ويهج وأنا بروح عند أبو عمر يمكن شاف فواز ؟

فاطمة( ام فواز ) : بس فديتك لا تتأخر .. وطمني على فواز ..

نواف ( ابو فواز) : انشاااء الله .. من عيوني .. (( راح ابو فواز بيت ابو عمر .. في هاللحظه نزلت هدى من غرفتها .. وشافت امها في الصالة ..))

هدى: أمي شفيج قاعده للحين .. دايما تنامين من الساعه 11:30 .. هاااا !! ليش تصيحين ؟؟ .. شو صار ؟

فاطمة ( ام فواز ): هداوي أخوج للحين ما رجع البيت وربيعه يقول أن فواز ما يا النادي ..

هدى: يمكن راح عند أحد من ربعه .. هيه صح .. نوره يوم يتني العصر قالت انها شافت فواز يتهاوش مع واحد عند البيت .. وفواز ركب سيارته وراح وهو معصب ..!!

فاطمة( ام فواز ) : ومتى صار كل هذا ؟

هدى : العصر ..يوم كان فواز رايح النادي ..

فاطمة( ام فواز): ولدي وين راح ؟؟ وين راح ..؟؟؟ (( ورجعت ام فواز في الصياح .. حاولت هدى ان تهدي امها بس كل محاولاتها باءت بالفشل .. لأن ام فواز كانت منهارة .. راحت هدى غرفتها ..حاولت تدق حق فواز .. بس ما يرد عليها .. واتصلت بنورة .. بس نورة ما ردت عليها لأنها كانت في سابع نومة .. رجعت هداوي ودقت في سارة .. ))

(سارة وهي قايمه من النوم ) : الو ..

هدى : هلا والله ساروه .. شخبارج ؟.. اقول ساروه . .محد شاف فواز ؟ لأنه للحين ما رجع البيت .. وما يرد علينا يوم ندق له ..

( ساره وهي مصدومه ) : ها .. ما ادري .. بسأل ابوي وعمر وبرد عليج خبر ..

هدى: بسرعه فديتج لأن أمي تحاتيه .. واسمحيلي دقيتلج في هالوقت المتأخز ..

سارة لا عادي .. وانشاء الله بطمنكم عليه .. يالله باي .. (( سكرت سارة التليفون وايدها على قلبها .. خايفه على فواز .. ساره تدق حق فواز بس ما يرد عليها .. وقعدت تحاتيه وما قدرت تنام .. نزلت تحت شافت ابو فواز قاعد مع ابوها وعمر في الميلس .. قعدت تطالعهم لين طلع ابو فواز .. نزلت وسألتهم ..

سارة: شو صاير .. غريبه ابو فواز يزورنا في هالوقت .. !!

سيف ( ابو عمر): ابو فواز يسأل عن ولده .. قاعدين يدورونه ويدقون له وما يرد عليهم ..

عمر : والله مدلعين فواز حيل .. وبس عشان تأخر للساعة وحده مسوين عزى ويدورون عليه ..

سيف ( ابو عمر ): عمر بس عاد .. انت ما تحترم الي اكبر عنك ؟ .. المفروض لو فيك خير تدق حق فواز وتدوره معاهم .. وبعدين فواز اول مره يتأخر لهالساعه .. دايما يرد البيت من وقت .. مش نفسك ترد الفجر ..

عمر : والله يخسي ادق له .. واصلا ما اعرف رقمه ولا اتنزل احط رقمه في تليفوني ..

سارة : ابوي .. حتى هدى دقت لي قبل شوي تقولي اسأليهم اذا شافوا فواز .. وقلت بسألهم وبرد لج خبر .. بس دام ان ابوها يا مش لازم ادق لها .. اكيد بيخبرهم ..

(( في هاللحظه .. نواف يدش بيته .... تقوم فاطمه وتسأله ...))

فاطمة( ام فواز) : ها بشر شو قالوا ؟؟

نواف ( ابو فواز ): يقولون ما شافوه ..

فاطمة( ام فواز ) : صارت الساعه وحده ونص وولدي للحين ما رجع ولا يرد علي يوم ادق له .. شسوي!! شسوي ؟؟؟ يارب رد لي ولدي (( ورجعت ام فواز تصيح ...))

نواف (ابو فواز ) : ام فواز الله يهداج .. بس عاد لا تصيحين ..اللي يشوفج يقول هذي ماشافت ولدها من شهر .. توها ماصارت الساعه ثنتين .. انا يوم كنت في عمر فواز كنت ما ارجع البيت الا الساعه 4 او 5 الفجر .. يالله فديتج قومي نامي .. وفواز عنده نسخه لمفتاح البيت وبيرجع بعد شوي انشاء الله ..

فاطمة( ام فواز) : كيف تباني انام وولدي ما يا للحين ؟؟ .. انا بقعد اترياه واذا رجع بنام .. والحين ما شي جدامي الا اني اصلي وادعي ربي ان يرد لي ولدي .. حبيبي انت روح نام اليوم وايد تعبت في الشغل وما ارتحت ..

نواف ( ابو فواز) : هيه والله احس اني تعبان و ظهري رايح وفيني نوم وباجر وراي دوام .. انزين انا بروح انام .. فديتج بعد ما تصلين نامي .. لا تسهرين وانشاء الله فواز ما بيتأخر ..

فاطمة( ام فواز): انت سير نام الحين وانا بنام بعدين ..

(( راح نواف ونام .. وفاطمة قاعده تصلي وتدعي ربها ان يرد لها ولدها .. في هاللحظة .. أحمد يدق حق فواز بس فواز ما يرد عليه .. تذكر ان زايد مع فواز في الدوام وهو دايما مع فواز .. دق أحمد لزايد .. بس زايد ما رد كان نايم .. دق له مر ثانيه بعد ما رد .. دق مره ثالثه .. ,,,,,,,,,.... زايد قام على صوت التليفون .. ...

زايد: مرحبا ..

أحمد : مرحبتين .. ما بغيت ترد ..

زايد: الصراحه اليوم تعبااان ونمت من وقت ..

أحمد : اها .. انزين ما شفت فواز ؟؟

زايد : فواز ! .. شفته اليوم العصر .. ليش تسأل؟؟

أحمد: لأن ابو فواز دق لي وقال ان فواز للحين ما رجع البيت .. وكلنا ندق له وما يرد علينا !!

زايد : غريبه .. فواز عمره ما تأخر عن البيت .. حده الساعة 12:00 ..

أحمد: والله ما ادري .. انت حاول تدق له .. انا الصراحه تعبان وبروح البيت انام .. يالله في حفظ الله

زايد: اوكي .. انت روح ارتاح .. وانا بروح ادور فواز .. مع السلامة ..

(( زايد يدق يدق يدق لفواز بس من دون فايده .. فواز ما يرد عليه .. صارت الساعة 3:00 .. قام زايد لبس ثياب وطلع بسيارته وراح عند النادي يدور فواز بس ما حصله .. راح الأماكن الي دايما فواز يروح لها .. راح القهوه .. المطعم .. الملعب .. بس لا جدوى ,, ما حصل فواز .. صارت الساعة 4:30 .. اذن الفجر وزايد يمشي عند البحر .. شاف اول مسجد جدامه وقف السياره ونزل توضى وقعد يقرا قرآن لين تقيم الصلاة .. في اللحظه ام فواز كانت تصلي وتدعي ,, سمعت اذان الفجر .. راحت تقوم ابو فواز حق الصلاة ..

فاطمة( ام فواز ) : نواف حبيبي قوم .. اذن الفجر ..

نواف ( ابو فواز): انشاء الله .. ها رجع فواز ..

فاطمة( ام فواز ) : لا .. للحين ما رجع .. يالله قوم صل الفجر وادعي الله ان يرد لنا ولدنا ..

نواف ( ابو فواز) : انشاء الله بس فديتج لا ترهقين نفسج اكثر .. روحي نامي .. ارتاحي ..

فاطمة ( ام فواز ) : انزين .. بس بصلي ..

(( بعد صلاة الفجر .. طلع زايد من المسجد .. وتفاجأ بسيارة فواز موقفه على الزاويه .. راح عند السياره .. طل من جامة السيارة .. وشاف ...................؟؟؟؟؟؟؟؟؟


*+*+*+*+*+*+*+*+*+*+*+*+*+*+*+*+*+*+*+*+*+*+*+*+*+ *+*+*+*+*+*+*+*+*+*+*

يا ترى شو شاف زايد من السياره ؟؟؟؟
ووين راح فواز ؟؟
وبيحصلون فواز ولا لاء ؟؟؟؟؟



كل هذا بتعرفونه في الجزء الخامس ...
وانشاء الله يكون هذا الجزء نال اعجابكم .. تراني تعبت وانا اعصر مخي عشان اطلع لكم هالقصه ..




اختكم,,
لمسة فن

:ters

شو محد عجبه هالجزء ؟؟؟؟؟؟؟؟

بالعكس روعه القصه

بس الظاهر محد انتبه لها

كل الشكر للمبدعه لمسة فن

بإنتظار الجزا الخامس

اشكرك الغالي ادمن عالمرور الحلو



الجزء الخامس بحطه قريب انشاء الله
بس يوم بشوف الكل قرا هالجزء ،،

عشان ما يتلخبطون

مازلنا ننتظر

والله قصة حلوة وجميلة ..

بس اعذريني اختي ... ما نتبهت له ..


انتظر الجزء الجاي بفارغ الصبر ..

تقبلي تحياتي

تسلموووون

اخيرا حصلت تشجيع

انشاء الله بكتب الجزء الخامس بأسرع وقت


واسموحلي عالتأخير

ومازلنا ننتظر

انشاء الله ما بتنتظرون وايد

كلهم يومين او ثلاثه وانا منزله الجزء الخامس


والسموحة