عيد ميلاد العنود
تذكرين الحفلة اللي من سنة
احنا رحناها سوى ؟!
عيد ميلاد العنود
تذكرين ؟!
احنا جينا الحفلة ذيك
متأخرين ..؟!
ضاع منا وقت واجد
بين كحلك .. والمرايا
وبين يديني .. وهي تبحث
في يدينك عن يدين
وانتي مشغولة بشعرك ..
لون فستانك ..
عطرك .. والشدو
والخصلتين ! احنا جينا الحفلة ذيك
متأخرين .. تذكرين ؟!
كانت الحفلة صخب
وناس .. وضحكات ..وطرب
ومابقى عطر بزجاجة
الا فوق ثياب ذيك لليلة بالحب انسكب
وكم وحدة من البنات
اسألت ليلتها عن
عطرك .. تسريحتك
بسمة اللولو مع القلب الذهب
كنتي فتنه وكنت احس وانتي بصدري
كل حلم بعيد
لحظتها .. قرب
كانت الليله عجب
اتذكر!
احنا ليلتها رقصنا مع بعض في الاغنية
قبل الاخيرة
قمت اخذتك وسط حظني
ودار فينا الليل واحلو الطرب
امـــــس .....
كـــــــان ....
عيد ميلاد العنود
رحت للحفلة وحيد ..
كانوا نفس الاصدقاء
والموسيقى .. نفسها ..
نفس الفرح
والعنود ..هي العنود ..
ما اختلف فيها جديد !
شي واحد مختلف ..
انك البارح
بعــيــد ..
بعض اللي في الحفلة سالني ..
ليش ماكنتي معاي
مادرو حنا افترقنا
وامتليت
حزن وقصيد
ولما جت الاغنية قبل الاخيرة
اغنيتنا ..
قمت اخذت ايدك .. رقصنا
كنت المّـك..
كنت اشم عطر.. واحسك
كنت اقول ..
كل الكلام اللي تحبينه واعيد
وانتي ماكنتي معاي
وانكسر في قلبي عيد
بعيد ميلاد العنود
الوحيد..
انا اللي كنت البارحة .. ماني وحيد

مسفر الدوسري