هلاااااااااااااااااااااا والله

هذا الجزء الثاني من قصتي ..

وارجع واقول اذا مرت عليكم اي كلمه ما فهمتوها قولوا لي وبخبركم معناها ^_^

وان شاء الله يعجبكم هالجزء

************************************************** ************************************************** ***************************


..-*-.. الجزء الثاني ..-*-..


جافوا حمد وهو طايح عالأرض .. ما يتحرك .. وجدامه بقعة دم عودة .. ؛؛؛؛؛ ... موزة من جافت المنظر قعدت تصيح وتصارخ .. نشت منى على اصواتهم .. ويوم جافت حمد ما عرفت شو تسوي .. على طول سارت واتصلت بالاسعاف .. ويو وشلوه المستشفى .. ساروا ام حمد وابو حمد المستشفى ويا حمد .. وسارت وياهم منى .. علاية كانت تترجاهم تبا تسير وياهم .. بس ام حمد عارضت وما خلتها تسير .. ))

علايه : امايه الله يخليج خليني اسير وياكم .. ابا اطمن على حمد ..

ام حمد : جب ولا كلمه .. ولا اتمين تسوين عمرج اونج خايفه عليه .. تراني خايفه عليه اكثر عنج ..

(( ظهروا وخلوا علاية تصيح .. وموزة بعد تصيح بس نفس الوقت تحاول انها تهدي علاية .. مرت نص ساعه عالسالفه .. وعلايه ومواز هب قادرين يصبرون .. جان تدق علايه بمنى ..

علاية : السلام عليكم ..

منى : نعم شو تبين ؟؟..

علايه : بشري شخبار حمد ؟

منى : بعدنا ما نعرف شي .. دخلوه يكشفون عليه ونحن في غرفة الانتظار ..

علايه : اها .. انزين يوم بيظهرونه او بيقولون عنه اي شي دقي وقولي لي ..

منى : يا هي سالفه .. انتي شو فيج ؟؟ .. مسويه عمرج خايفه عليه واونج تحاتينه .. جوفي .. ما يخصج فحمد .. ولا اتمين تدقين وتحشريني .. تراني مب ناقصه سخافاتج ودلعج ..

( علايه منصدمه من كلام منى .. بس هي متعوده على معاملة منى القاسية .. )

علاية : منى مثل ما تخافين على اخوج .. انا بعد اخاف عليه .. تراه اخوي مثل ما هو اخوج .. (توها علايه تبا تكمل كلامها .. الا ومنى تسكر التليفون في ويه علايه .. ) .. ( علياء سكرت السماعه ومنزله راسها وتصيح من دون صوت .. مواز عرفت ان منى ضايقت علايه .. منى وامها دوم يضايقون علايه ويحسسونها انها مصدر ازعاج للجميع .. وحتى اخوانها الصغار سالم و منصوركانوا يضايقون علايه .. لأن منى كانت تكلمهم وتبين لهم ان علايه مصدر المشاكل في هالبيت .. بس علايه كانت دومها تصبر وما تاخذ في خاطرها عليهم .. ودومها تسوي اي شي يسعدهم ويرضيهم .. بس هم ما يحسون .. قلوبهم قاسيه وحاقده .. يت موزة عند علاية .. )

مواز : علايه .. الحين الساعة اربع .. سيري رقدي وراج كلية ..

علاية : لا عادي انا دوامي مسائي من الساعة 12 .. انتي سيري رقدي عليج مدرسة من الساعة سبع ..

مواز : الصراحه مافيني رقاد .. احاتي حمد ..

علاية : هيه حتى انا والله .. هب رايمه افكر في اي شي غير حمد ..

مواز : علايه .. من شو الدم الي في حجرة حمد ؟؟ .. هو منجرح ؟

علاية : لا .. بس انا شفت الدم يظهر من حلجه ..

مواز : ها !! ... من حلجه ؟؟. ..! .. ليكون مرض الطاعون ! ..

علاية : لا بسم الله عليه .. الله لا قال .

مواز : بس الي يرجعون دم يكون فيهم الطاعون ..

علايه : بس اول مره اجوف حمد يرجع دم .. انشاء الله ما يكون فيه شي .. ويرد لنا بالسلامة ..

مواز : ان شاء الله يا ربي .. الله يسمع منج ..

علايه : يالله باقي شوي عن الأذان .. قومي بنتوضى وبنقرا قرآن لين اذان الفجر ..

مواز : ان شاء الله .. وبندعي حق حمد ان الله يشفيه ويعافيه ..

( علاية ومواز توضوا وتموا يقرن قرآن .. لين أذان الفجر .. وعقب صلوا .. وتموا يدعون حق حمد ان الله يعافيه ويرده لهم بالسلامة .. خلصوا صلاه وتموا يالسين يتريون اي خبر عن حمد .. علايه ما رامت تتحمل .. جان تدق حق منى .. تليفون منى يرن وما تشله .. عقب دقت حق ابوها .. بس سمعوا صوت تليفون ابوها في الصاله .. يعني ابوها ما شل تليفونه .. ردت ودقت حق منى مره ثانيه .. جافت تليفون منى مغلق .. قعدوا مواز وعلايه على اعصابهم وخايفين .. )

علاية : مواز قومي البسي بتسيرين المدرسة .. الحين الساعه ست ونص .. انا بسير اوقض سلوم و منصور..

مواز : ما اروم اخليج روحج .. اذا انا و سلوم و منصور سرنا المدرسه بتيمن روحج ..

علاية : لا تحاتيني الغالية .. انا بتم اتريا اي خبر عن حمد .. وما اظن اني بسير الكلية اليوم .. لأني ابا اسير المستشفى اجوف حمد ..

مواز : وانا بعد ما ابا اسير المدرسة .. ما اروم .. احس اني اذا سرت ما بروم اركز ولا بفهم اي شي في الصف .. بتم احاتيكم والله . ..

علايه : لا فديتج سيري المدرسة .. عالاقل داومي لج نص دوام وعقب انا بيي اخذج ...

مواز : لا لا ما ابا اسير ..

( حاولت علايه في مواز انها تسير المدرسه بس ما رامت عليها .. موزة كانت مصره .. )

علايه : انزين عيل . .. انا بسير اوقظ سلوم و منصور وانتي خلي الخدامه تحط لهم الريوق ..

مواز : اوكي ..

علايه : مواز حبيبتي .. ما نبا سلوم و منصور يعرفون اي شي عن حمد ..

مواز : ان شاء الله ..

( سارت علايه ووقظت اخوانها .. نشوا اخوانها تسبحوا ولبسوا ثيابهم.. ساروا يتريقون .. )

سالم : شو ليش البيت هدوء ؟؟ .. وين حمد ومنى !! ..

مواز : ساروا بعد شو .. تراكم انتوا اليوم الي متأخرين عن دواماتكم .. (موزة بينت لسالم ان حمد ومنى ساروا دواماتهم.. ما تبا اخوانها الصغار يعرفون ان حمد في المستشفى)

منصور : وانتي ليش مب لابسه مريولج ؟

مواز : ما بداوم اليوم .. بطني يعورني .. ( وتغمز مواز حق علايه )

علايه : يالله حبايبي تريقوا وبيوصلكم الدريول ..

( خلصوا اخوانها ريوق وساروا المدرسة .. علايه ومواز يالسين ويحاتون .. ابوهم ما شل التليفون .. ومنى غالقه تليفونها .. وعلايه ما تبا تدق على تليفون امها لأنها تعرف ان امها بتعصب عليها ..

علاية : شو نسوي الحين .. الساعه ثمان وما عرفنا اي شي عن حمد ..

موزة: ما دقينا حق امايه ..

علايه : الصراحه احس اني اذا دقيت لها بتعصب علي .. وخاصه انها معصبه علي من في الليل يوم وقضتهم من النوم ..

موزة : والله صدمتني امي .. اول ما نزت من حجرتي جفتها تعطيج كف عويهج ..

علاية : ما الومها يا مواز .. امي حليلها كانت راقده .. وبعدين انتي تعرفين ان امي ما ترقد الظهر وانا وقظتها وقت راحتها .. وكنت اصارخ وادق الباب بالقو .. بس والله اني كنت صدق خايفه على حمد .. وما احس بعمري شو اسوي .. كنت منفعله وايد ..

موزة : اها .. انزين انا بدق لها ..

علاية : اوكي دقيلها .. وتخبريها عن حمد ..

( دقت مواز حق امها وحطت التليفون عالسبيكر عشان يسمعون هي وعلاية .. رن اربع رنات وعقب ردت عليها امها .. )

مواز : السلام عليج اماية ..

ام حمد : وعليج السلام مويز ..

موزة : ها شخبار حمد امايه ؟

ام حمد : بعده في العناية المركزة ..

موزة : بسم الله عليه .. ليش؟

ام حمد : يقولون ان الدودة الزايده انفجرت في بطنه

( علايه حطت ايدها على ويهها وقعدت تصيح .. وموزة تتكلم وهي خايفه على حمد . . )

موزة : من متى دخلوه غرفة العمليات ؟

ام حمد: اول ما وصلنا كشفوا عليه وعلى طول ودوه غرفة العمليات .. ومن ساعة ظهروه وحطوه في العناية المركزة .. وقالوا لو تأخرتوا وما يبتوه المستشفى بسرعه جان مات ..

موزة : بسم الله عليه .. الله يعافيه ويرده لنا بالسلامة ان شاء الله ..

ام حمد : ان شاء الله .. عيل اقول .. انتي ما سرتي المدرسة ؟

موزة : لا ما سرت .. ترى علايه روحها في البيت وانا بتم احاتيكم اذا سرت ..

ام حمد : وكيف تغيبين من المدرسة ؟ اكيد علاية قالت لج لا تسيرين المدرسة ..

موزة : لا.. والله ان علايه ما لها خص .. اصلا علايه حاولت فيني تباني اسير المدرسة بس انا اصريت اني اتم وياها ..

ام حمد : وينها علياء ؟؟ .. هاتيها برمسها ..

( علاية تاخذ السماعه وهي خايفه .. )

علاية : السلام عليكم امايه ..

ام حمد : امج في عينج يالسباله .. كيف تخلين اختج ما تسير المدرسة ؟؟.. جوفي الحين تودينها المدرسة .. فاهمه ؟

علاية : ان شاء الله .. انزين عادي ايي عندكم المستشفى عقب ما اوصلها ؟

ام حمد : لا طبعا .. لا اتين المستشفى .. وعقب ما يوصلج الدريول الكلية خليه يمر علينا ..

علاية : بس انا ما بسير الكلية .. بيي المستشفى بطمن على حمد ...

ام حمد : وليش ما تسيرين الكلية ان شاء الله ؟؟ .. غصبا عنج تسيرين ولا تجادلين ..

( علايه وهي مقهوره والدموع ما وقفت من عيونها .. ): ان شاء الله امايه ..

( وتسكر ام حمد التليفون في ويه علاية .. وتركض علايه حجرتها وتقعد تصيح .. تلحقها موزوة . .)

موزوة: علايه فديتج لا تضيقين بعمرج .. يمكن امي منفعله لانها خايفه على حمد ..

( علايه تمسح دموعها .. وتهدي شوي ) : يالله مواز .. البسي مريولج بوصلج المدرسة ويا الدريول والخدامه ..

مواز : لا مابسير وبخليج ..

علايه : يالله فديتج مواز .. امي عصبت انج ما سرتي المدرسة .. وانا بعد بسير الكلية ..

مواز : علايه سامحيني .. بسبتي امايه عصبت عليج ..

علايه : افا عليج حبيبتي .. ما صار شي .. يالله فديتج سيري البسي ..

( سارت علايه مع الدريول والخدامه .. وصلوا مواز المدرسة وردت البيت .. وتمت علايه يالسة روحها في حجرتها .. وتحاتي حمد وتدعي له .. تبا تدق تطمن عليه بس تعرف ان امها ومنى بيعصبون عليها ... سارت توضت وصلت ركعتين وتدعي فيهم ان الله يقوم اخوها حمد بالسلامة .. كانت الساعة 11 ونص .. يلست علايه عند التليفون .. على امل ان حد يدق ويطمنها على حمد .. تمت يالسه شوي ورقدت .. شوي ويرن تليفون علايه .. نشت علايه بسرعه .. جافت رقم ربيعتها فاطمة .. ردت عليها )

علايه : الو ..

فاطمة : السلام عليكم ..

علاية : وعليج السلام تامي .. شحالج ..

فاطمة: اوه .. علايه ؟

علايه : هيه علايه .. بلاج تامي ..

فاطمة : علايه بلاج ؟؟ والله اني ما عرفتج .. ليش جيه صوتج ؟

( علايه تذكرت حمد .. وردت تصيح .. ) : تامي . .

فاطمة : بلاج حبيبتي .. ليش تصيحين !

علاية : اخويه حمد ..

فاطمة : بلاه اخوج ؟

علايه : البارحه حلمته انه ميت .. ويوم نشيت وسرت حجرته حصلته طايح عالارض ويتويع .. وعقب رجّع دم ..

فاطمة : بسم الله .. والحين ؟

علاية : الحين هو في المستشفى .. سوو له عملية والحين هو في العناية المركزة ..

فاطمة : عملية شو ؟

علاية : الدودة الزايده منفجره في بطنه ..

فاطمة : حليله .. الله يعافيه ان شاء الله .. انتي وين الحين ؟

علايه : انا في البيت ..

فاطمة : شو ما بتداومين ؟

علاية : اوه .. الساعه كم ؟؟

فاطمة : الكلاس بيبدا عقب عشر دقايق ..

علايه : الحين بلبس وبيي .. يالله باي

فاطمة : اوكي عيل .. اترياج .. باي ..

( سارت علايه ولبست بسرعه وسارت الكلية .. زين انها دشت الكلاس قبل لا يدش الاستاذ .. كان شكلها تعباااان وعيونها محمره .. علايه ما رامت تستوعب ولا شي من الي شرحه الاستاذ .. كان كل تفكيرها بأخوها حمد .. تحاتيه .. بدا البريك وكل البنات ساروا الكانتين يتغدون .. الا علايه الي حطت راسها على الطاوله وقعدت تصيح .. فاطمة انتبهت لها .. ويتها .. )

فاطمة : علايه حبيبتي بلاج ؟.. فديتج نشي .. ان شاء الله حمد بيقوم بالسلامه وبيرد البيت .. وبتجابلينه لين تملين منه ..

علايه : ابا اسير اتطمن عليه ..

فاطمة : فديتج والله .. عقب الدوام يوم بييج الدريول خليه يوصلج عند اخوج ..

علايه : امي قالت لي لا تسيرين المستشفى .. ( ورجعت تصيح )

فاطمة : علايه حبيبتي .. اوعدج اني انا بنفسي بوديج تجوفين اخوج ..

علايه : بتوديني عند حمد ؟؟ ..

فاطمة : هيه فديتج بوديج عنده .. بس الحين قومي بنسير نتغدا ..

علايه : ما اشتهي شي ..

فاطمة : لا فديتج لازم تاكلين .. يالله قومي كلي ..

( قامت علايه ويا فاطمة .. شوي وتطيح علايه عالأرض .. تيمعوا البنات على علاية .....

# يا ترى شو بيصير في علايه ..

# وهل بتجوغ أخوها حمد ولا لاء ؟؟

# وليش أم حمد قالت لحمد ان علايه مب أخته .. ؟؟ .. شو قصة هالعبارة ؟

************************************************** ************************************************** ***************************

كح كح

شو رايكم ^_^



لمسوه

رووعة والله
بس يا ليت لو تكملينها بسررعة يا لمسة
عنجد قصة حلوة
أنتظر الجزء الجااي
وتسلمين اخيتي
ولا عدمناكِ

^_^

تسلم والله

وان شاء الله بحط الجزء الجديد

بس غريبه .. وين باقي القراء ؟؟؟