العزوبي:
قال العزوبي يوم شـاف المعاريـس *** الرابـح اللـي لا قعـد مايقـومـي

أول سنـة كـلٍ يبـث الاحاسيـس *** وثاني سنة تجلب عليـك الهمومـي

وثالث سنة حط الرمـل والمتاريـس *** لابد مـن حـربٍ تقـوم وتدومـي

لامن دخلـت الـدار لاكنهـا بليـس *** متلفلـفٍ فـي غاليـات الهدومـي

تأخذ من المخباة وتسحب من الكيس *** وتغيـر الموديـل شـيٍ لـزومـي

وان قلت ما أملك يامره لوهو فليس *** قالـت تديّـن لا تكـثـر بلـومـي

ولاجيت مرة نـاويٍ( أكل المكابيس) *** قالت تصّبـر خـل قلبـك رحومـي

ليتك تساعدنـي تصحـح كراريـس *** زادوا علينا أربع حصص في العلومي

أزوارة في العصر والصبح تدريـس *** والليـل تصحيـحٍ وودي أنـومـي

تبكي إذا جاها وجع لوهـو ضريـس *** وتقول أبي دكتـور ماهـو حكومـي

يروح عمرك بين عرسٍ وتأسيـس *** واربـع سنيـن والبزاريـن كومـي

وسط المطابخ بين قـز ومحاميـس *** هـذا صحـن رزٍ وهـذاك ثـومـي

والا خلصـت إمنظـفٍ الملالـيـس *** جتك تقول انهـج نبـي زود لومـي

ولا جبت قالت اكنس الحوش تكنيس *** خل البلاط يصيـر مثـل النجومـي

ومكرسٍ جهدك من الخوف تكريـس *** وان نادتك بالصوت اقبلـت مومـي

يجيك تـال الليـل دايـم كوابيـس *** ويشيبنـك مزعـجـات الحلـومـي

هذي حياة اللي ركض (يالمعاريس) *** ضيع حيـاة أول وصـار محرومـي

تعيش يالمعـرس حيـاة المحابيـس *** وشف العزوبي بكل شارع يحومـي

من مفرق جلاجل إلى جوي للخيـس *** وان حار حايرهم بوسطـه يعومـي

يفرح إذا شاف الوتـر والمراويـس *** وفي كـل يـومٍ كاشـتٍ ومعزومـي

شف العزوبي مايعـرف الهواجيـس *** ولا يـودي حرمتـه كـل يـومـي

يا عنك ماحاش الفخـر والنواميـس *** الا عزوبـيٍ يـعـرف السلـومـي

اذا اعرس المعرس غدا عندنا هيس *** ونزيل اسمه مـن سجـل القرومـي

والى بغيـت البهذلـة والدحاويـس *** فأعرس وخلك من عـداد الرخومـي

وش صابكم من عرسكم يا المفاليس *** وش استفدتوا غيـر دق الخشومـي

اللي تزوج أشهد انـه غـدا تعيـس *** والرابح( اللي نجى بطرق الهدومي)

ترى عناق العام نطت على التيـس *** والحرعقب العـرس يصيـر بومـي

قال العريس:

قال العريس أنا الذي في سـعاده ××× ماني عــزوبــي ضايق الصدر مهموم

مبسوط من مثلي قعـد عنــد غاده ××× مهوب مثـل اللي لحاله تقل بـــوم

في كل لــيله حاضنٍ لـه وسـاده ××× وانا مـع المـزيون في غـرفة النوم

أنا اشهد انه عايـشٍ في قــراده ××× يروح عــمــره مـا تهنى ولا يوم

الى دخــل للبيت يبلش بــزاده ××× يقعد يقــطّـع له طمــاطٍ معه ثوم

ولا قضى عقب العصـر من عداده ××× والـحوض من كثر المواعين مزحوم

والى غسلهن ثم فـك الســـداده ××× دلى يغســل له سـراويل وهــدوم

وان ماطــبخ روّح لمطعـم حمـاده ××× والا قـعد في منزله واعـلن الصوم

وان جاه ضيفٍ باغيٍ لـه رفـاده ××× يـروح يشــري رز وايـدام ولحوم

ما يعرف الشمبو وراسـه عــراده ××× وشــمغه من الكواي ملـيانه رقوم

ما يكنس الفرشــه ويلقط بــداده ××× اما بقـايا رز او خــبز معــروم

عنده صراصيرٍ بحـاجه ابــاده ××× تسـرح وتمرح في الغرف دايم الدوم

يجمع قروشه ويتســـلف زيـاده ××× حتى يسافر مصـر او ديرة الروم

او راح يم التاي وتـــرك بـلاده ××× ناظر جـوازه ممـتلي كله ختوم

دايم يسافر ما يعـرف العــباده ××× ( ضيع حقوق الرب هذاك محروم)

وإلى رجع يـروح يـم العــياده ××× (أمراض شتى والخبر صار معلوم)

وإلى قعد ( بالبيت قابل وساده ) ××× حيثه مسيكينٍ مـن العرس محـروم

له موتر خرده كثير فســـاده ××× في كل يـومٍ في الاشارات مصـدوم

غمارته تقول ورشــة حـــداده ××× ومريقـده في شـنطته دوم محزوم

دوم يتنقل تقــل كنه جــراده ××× في كـل يومٍ نازل له على قــــوم

يسهر والى قام الظهر من رقـاده ××× روّح على شغله والى اليوم مخصـوم

يذي بنات الناس( حاس بسعاده )××× (في كل يومٍ زاهمٍ له على قوم

وراه مايعـرس) ويترك عناده) ××× يترك بـنات الناس ويصير معصوم

يلقى هنوفٍ تخـدمه مثـل داده ××× ويصــير رجّالٍ ويسلم من اللوم

يفرح الى من قرب وقت الولاده ××× ويصير معنى العرس بالحيل مفهوم

يشوف أولاده ومعهم شهـــاده ××× قبل الـوفاة وقولة الناس مرحــوم

هههههههههههههههههه

الله عليك منت سهل يا الأمااااكن


الله يعين كل واحد بيفكر كذيه


تحياتي لك

الفاااااااااااااااااااارسه

علشان تحسون بالعزوبيه مساكين والله يكون بعونااااااااااااا هههههههههه

تسلمين اختي على المرور

همس الليل

لازم نفكر جذي هههههههههههه

تسلمين على المرور