احم احم

هلا والله

شحالكم .. عساكم بخير ونعمه ان شاء الله ^_^

ممممممم .. من هواياتي كتابتة القصص ..

كتبت هالقصة .. وقسمتها لأجزاء

هالقصه بلهجتنا .. الاماراتيه ..

اذا في اي كلمه ما فهمتوها .. خبروني وبقول لكم معناها

اوكيك ^_^

وان شاء الله تعجبكم

وهذا هو الجزء الاول من القصة ..

************************************************** ************************************************** **********************





*+* يا دنيا عطيني برهان .. الي قلبه طيب دومه خسران *+*
تأليف: لمسة فن





..-*-.. الجزء الأول ..-*-..



دخلت علايه حجرتها كالعادة .. ركضت وعقت عمرها عالسرير وحضنت مخدتها وقعدت تصيح بحرارة .. << علياء بنت عمرها 19 سنة .. تعيش ويا أمها آمنه القاسية وأبوها حسن الطيب .. واخوانها
حمد 26 سنة.. عمر24 سنة .. منى 21 سنة.. موزة 15 سنة .. سالم و منصور (توأم) 12 سنة ..

علياء تصيح واعيونها محمره .. وفاره جسمها الضعيف عالسرير .. فجأة .. يرن تليفون علاية .. شلت تليفونها جان تجوف رقم ربيعتها الروح بالروح "فاطمة" .. جان تمسح دموعها وترد عليها ..

علاية: الو .. السلام عليج تامي ..

فاطمة: هلا الغالية ..وعليج السلام .. شحالج علايه عساج بخير ونعمه ..

علاية: اي خير !! .. ليش انا جفت الخير من هالام .. ( ورجعت تصيح )

فاطمة: ياربي .. رديتي وتضاربتي ويا امج مره ثانيه !! ..

علاية: تامي والله محد بيحس فيني الا الي يجرب الي يصير فيني من امي .. والله ما احس بذرة حنان منها .. أحاول قد ما اقدر اني اكون طيبه وياها .. اطيع كل أوامرها .. ما اعارضها في اي شي .. وبعد تعاملني بقسوة .. يا ربي انا شو سويت في هالدنيا عشان أحصل هالمعامله .. (علايه منهاره وتصيح من خاطرها )

فاطمة : فديت روحج يا عليا .. والله احس فيج حبيبتي .. بس عشاني علايه .. لو لي خاطر عندج هدي وانسي الموضوع .. ما احب اجوفج زعلانه .. وين الضحكه الي عوديتي اني اسمعها منج ؟.. يالله عشاني اضحكي ..

علاية: تامي .. والله اني اضحك وياكم وداخلي حزن .. بس ما ودي اخلي الي احبهم يشاركوني حزني وتعاستي في هالدنيا .. وبس عشان خاطرج يا تامي بنسى الموضوع وما بصيح..

فاطمة : فديتج والله يا علايه .. يعلم الله اني اعزج وأحبج واعدج اكثر من أخت ..

علاية : فديت روحج يا تامي .. والله اني من ارمسج انتي وسلامي ارتاح وانسى الي فيني من حزن وهموم .. الله يخليلي اياكم ولا يحرمني منكم .. بس اباكم اتمون دوم وياي ..

فاطمة : ان شاء الله .. وتأكدي يا علايه انا بنتم معاج وما بنخليج لحظة .. وكل ما تحتاجين لنا بنكون يمبج ومستحيل نتخلى عنج ..

* تموا علايه وتامي يسولفون .. وتدخل سلامي عالخط .. *

علاية : سبحان الله بنت حلال .. تونا نرمس عنها ..

فاطمة : شو السالفة ؟؟؟..

علايه : هاي سلامي عالخط الثاني ..

فاطمة : هيه اوكي عيل انا بخليج الحين بسير عند امي شوي .. وسلمي على سلامي ..

علايه : يبلغ ان شاء الله .. تامريني على شي ؟..

فاطمة : سلامتج الغالية .. وخلونا نتيمع مره .. صارلي فتره ما جفت سلامي ..

علاية : ان شاء الله .. بنجوف بنحدد يوم نسير فيه حديقة المشرف ونتشاوف هناك ..

فاطمة : على خير الغالية .. يالله عيل تحملي على عمرج .. وربي يحفظج ..

علاية : انشاء الله .. ويحفظج الغالية .. مع السلامة ..

فاطمة : باي ..

* ردت علايه على سلامي .. *

علاية : هلا والله بالغالية .. بنت حلال ييتي على طاريج ..

سلامي : هلا وغلا بالحلوين .. انتي وامنوا تحشون فيني !

علايه : ههههه انا وتامي كنا نرمس عنج .. بس ما رمسنا الا بكل خير ^_^

سلامي : ^_^ شخبارها تامي ..

علايه : بخير وسهاله .. وتسلم عليج بعد .. وتقول انها تبانا نتيمع مره في حديقة المشرف << مشتاقتلج

سلامي : فديتها والله .. الله يسلمها ..وانشاء الله بنحدد يوم عشان نسير رباعه .. المهم انتي شحالج ..

علايه : الحمد لله .. ها شخبارج انتي العروس ..

سلامي : هههههه توني بس انخطبت وتقولين عروس !! ..

علايه : ههههه هيه صدق .. متى ملجتج ؟..

سلامي : ما سرع ما نسيتي يالدبه !! .. كم مره بخرج ؟ ..

علايه : ما يصير امزح ^_^ .. ادري ان ملجتج يوم الخميس .. بس ابا ارفع ضغطج شوي ..

سلامي : دبووووووووووووه ..

علايه : ههههههه انزين .. يبتي فستانج من عند المصمم ولا بعدج ؟ ..

سلامي : هيه يبته .. ويا ويهه المصمم مسولي الفستان وسيييييع .. واليوم رديتله اياه وقلت له يضوقه ..

علايه : اها .. يالله عاد باجي اربع ايام عن الملجه .. شو شعورج ..

سلامي : هههههه عادية ..

علايه : هههههههه هيه عاديه .. بنجوف يوم الملجه شو بتسوين ^_^ .. بس يخوفي انج تشردين اول ما يدش المعرس ..

سلامي : هههههه شو اشرد وين يالسين ههههه .. لا عادي .. انا هب من النوع الي يستحي .. تعرفيني قويه في هالمواقف ..

علايه : هيه هيه قويه .. واضح امره .. ما ادري منو انخش وراي يوم شفتي معلمة العربي في الجمعية ..

سلامي : ههه ما كنت مستحيه بس تفاجأت يوم جفتها فجأه في ويهي ..

علايه : ههههههه انزين بنجوف يوم الملجه .. ..

* قعدوا علايه وسلامي يرمسون .. شوي ويدق حمد باب حجرة علايه ..*

علايه : منو ؟

حمد : انا حمد .. اروم ادش ؟

علايه : افا عليك حمود .. دش بدون لا تستأذن ..

* حمد دش الحجره ويلس يمب علايه *

حمد : ها .. بلاه خشمج جيه محمر ؟

علايه : ها .. من الضحك احمر وانا ارمس سلامي وننكت على بعض ..

سلامي : منو وياج ؟

علايه: هذا حمود عندي في الحجرة

سلامي : هيه .. سلمي عليه وقولي له محصلين لك عروس غاويه ..

* حمد يالس يمب علايه ويسمع كلام سلامي .. *

علايه : تسمع حمود ؟؟ .. هاي سلامي تسلم عليك ..

حمد : الله يسلمج سلامي .. ونتريا العروس .. بس هب تيبيلي وحده خسفه شراتج .. خخخخ

سلامي : الخسف انت ويا راسك .. لا تخليني اخبر عليك عمي ..

(( سلامي بنت عم علايه وحمد وأختهم في نفس الوقت.. لأنها مرضوعه معاهم .. ))

حمد : ههههههه انا خسف ها !! .. انا اصلا كل بنيه تتمنى واحد شراتي ..

سلامي : هيه ما ادري منو انت عاد !! .. الهنود احلى عنك ..

حمد : تخسين .. عاد جوفي ويهج قبل .. يالبطة

سلامي : جب جب يالخرتيت ..

علايه : هههههه شو لين الحين تتزاقرون بألقابكم !


حمد : هههههههههههه .. شكلها سلامي بتكفخني اليوم .. خلاص خلاص .. آسفين يالحلوين ^_^

سلامي : ههههه لا ادريبك تمزح ..

حمد: انزين يالله اجلبي ويهج وسكري .. ابا اسولف ويا اختيه ..

علايه : ههههه لا حرام عليك .. حمودوه عاد كله ولا سلامي ..

سلامي : لا عادي بسير ارقد انا .. وسلموا على عمي وعمتيه ..

حمد : هههههه اونها بتسير ترقد ... الا خايفه رصيدها يخلص ..

سلامي : هههههههه جب جب خرتيتوه .. خلني اسكر احسن .. يالله عيل تحملوا على عماركم .. ربي يحفظكم ..

حمد : الله وياج الغالية ..

علايه : ان شاء الله الغالية .. يالله عيل .. ربي وياج .. باي

سلامي : باي ..

(( يلست علايه تسولف ويا حمد .. وعقب يت اختهم موزوه ويلست وياهم .. موزة وحمد اقرب اثنين لعلايه .. وايد يحبونها ويحسون بقسوة امهم عليها .. ودوم يدافعون عنها .. علايه وايد تحبهم وترتاح لهم .. وتستانس يوم تسولف وياهم .. لو ماكانوا هم معاها جان كانت حالتها اخس من الي هي فيه .. .. تموا يسولفون لين الساعة 1 ونص في الليل .. ))

موزوه : بليييه .. الساعه وحده ونص... وباجر دوامات .. انا بسير برقد

علايه : هيه سيري ارقدي .. تراج ان ما رقدتي من وقت ما ترومين تنشين الصبح بسرعه ..

(( سارت مواز حجرتها وخلت حمد وعلايه ))

حمد : اما انا بتأخر باجر عن الدوام .. لأني بسير العيادة ..

علايه : ليش ؟ .. عسى ماشر .. بلاك حمود ؟

حمد : ماشي .. بس مرات أحس بآلام في بطني .. ما ادري ليش !

علايه : اها .. الله يعافيك ان شاء الله .. وما تشوف شر الغالي..

حمد : الشر ما اييج .. يالله عيل انا بسير.. ارقدي انتي ولا تقعدين تفكرين .. وما احب اجوف اختي الغالية متضايجه ^_^ ..

علايه : افا عليك ... دام انكم انت ومواز وسلامي ويايه انا بخير ^_^

(( ظهر حمد .. ويلست علايه روحها في حجرتها .. ظهرت دفترها الاسود .. وقعدت تكتب فيه .. ويوم خلصت خشته تحت السرير ورقدت .. ))

(( نشت علايه الصبح على صوت امها وهي تصارخ ومعصبه .. صوتها شال الدنيا .. ظرهت من حجرتها جان تحصل حمد طايح عالأرض وما يتحرك .. ركضت علايه صوبه وتصارح .. ))

علايه : حمود .. حمود بلاك ؟؟.. دخيلك نش حمد فديتك نش .. بلاك ليش ما ترد علي .. حمد لا تروح دخيلك لا تروح .. لا تموت يا حمد .. لا تخليني روحي .. حمد نش دخيلك .. (وتصيح علايه )

(( شوي وتحصل علايه امها تدزها وتبعدها عن حمد .. .... ... .....

... .. .... قامت علايه من النوم وهي تتعوذ من ابليس وتتفل على جهة اليسار .. وخايفه وقلبها يدق بسرعه .. وتتحمد الله ان الي صار حلم هب صدق .. يت علايه تبا ترقد جان تجوف مكالمه لم يرد عليها .. جافت ان حمد داق لها من نص ساعه .. الساعة الحين ثلاث ونص في الليل .. شو الي يخلي حمد يدق لها في هالوقت .. وبعدين اذا هو كان يباها في شي ما بيدق. بييها الحجره .. خافت علايه زياده .. وما رامت ترقد .. جان تظهر علايه من حجرتها وسارت صوب حجرة حمد .. البيت ظلام والكل راقد .. وهدوء .. قربت من حجرة حمد وتسمع صوت حد يتويع .. قربت اكثر من باب الحجرة .. وتسمع حمد يتويع ( اااااااخ .. ااااااااااااااااااخ ) .. خافت علايه وفجت باب حجرة حمد .. جافت حمد طايح عالارض وحاط ايدينه على بطنه ويصارخ .. علايه ركضت صوب حمد وايدها عقلبها وخايفه عليه ..))

علايه : حمد .. حمد شوفيك .. شو يعورك يا حمد ؟

حمد : اااااااااااااااااااخ .. بموووووووووت .. بموت يا علايه بمووووووووووت ..

علاية : بسم الله عليك.. حمد بلاك .. شو يعورك قولي يا حمد ؟؟..

حمد : بطني يا علايه .. أحس ان بطني بيتقطع .. آآآآآآآآآآآآآآآآآآآآخ .. بطني ..

علايه : لحظه حمد .. دخيلك تحمل شوي .. بزقر حد ..

(( تركض علاية صوب حجرة ابوها و امها وهي منهارة وتصيح .. وخايفه على حمد يصير له شي .. وصلت علايه حجرت امها وابوها وتدق الباب بالقو .. وتصارخ عند الباب ...))

علايه : ابويه .. امايه .. دخيلكم الحقوا على حمد .. فجوا الباب .. تعالوا دخيلكم ..

(( تنش ام حمد عصوت علايه .. وينش ابو حمد .. فجت ام حمد الباب وهي معصبه .. وجافت علايه عند الباب .. جان تعطيها كف على ويهها .. طاحت علايه عالارض من قوة الكف .. وتجوف امها وهي منصدمه ..

ام حمد : شو ها انتي .. ما تجوفينا راقدين .. اتين وتوقضينا في هالوقت ؟؟..

ابو حمد : ... ( يجوف علايه ومنصدم من الحركه الي سوتها ام حمد .. يا صوب علايه وقومها ) ام حمد .. كيف تضربين بنتج بهالطريقة ؟؟

( علايه تصيح وماشي هامنها غير حمد الي خايفه عليه .. موزة كانت واقفه عند الدري و تجوف كل شي وانصدمت من الي سوته امها بعلاية .. )

ام حمد : ما تجوفها تزعجنا .. ما خلتنا نتهنا برقادنا وتوقظنا في هالوقت !! ..

علايه : ابويه .. حمد .. حمد ..

ابو حمد : بلاه حمد ؟؟

علايه : ابويه الحقوا على حمد .. الحقوا على حمد .. ( ونشت وهي تصيح وراحت تركض صوب حجرة حمد .. ساروا ام حمد وابو حمد وموزة وراها .. انصدموا من المنظر الي جافوه جدام عيونهم ... وعلايه بدت تصارخ وتصيح اكثر .. جافوا حمد وهو ......


# يا ترى ليش أم حمد تقسي على بنتها علايه ؟؟

# وحمد شوفيه ؟؟

# وهل بيتم حيتم حمد حي ولا بيصيبه شي !!



************************************************** ************************************************** *************************

والبقيه في الجزء الثاني ..

يالله انتظر رايكم في تأليفي ^_^


لمسوه