مهنته زبال
شتيمة, مش كده!!
يعني ممكن تهزر مع واحد صاحبك و تقوله يا زبال
تخيل اننا بنعتبر المهنة دي إهانة!!
مش بس كده, لما بنبقي في الشارع, اسهل حاجة عندنا نرمي اي حاجة علي الارض...
تحب تشوف والدك في الوضع ده؟؟؟
تحب تشوف والدك بيوطي و يشيل زبالتك؟؟
عارفين ايه كمان!!
الراجل ده بيبقض حوالي 70 جنيه في الشهر
اقولكم يعني ايه
يعني لما حضرتك بتجيب علبة سمنة, بس من النوع النضيف, مش نباتي.
تعرف ان علبه السمنة الواحدة اكتر من نصف مرتب الراجل ده!!
طيب ليه كده!!
ماهو كان ممكن الراجل ده يقعد علي الرصيف و يشحت زي ما بنشوف ناس كتير كده, علي الاقل مش هيتعامل مع وسط كله امراض....
عارفين ده معناه ايه؟؟
الراجل ده كرامتة غالية عليه جدا
و فضل انه يشتغل في مهنة زي دي, بدل ما يمد ايده للناس....
و كان جزاء الراجل ده ايه!!, ان احنا عملنا مهنته اهانة, بعدم احترامنا ليها, و للناس اللي شغاله فيها,,
و مش بس كده, بدل ما بنساعد الراجل ده, اللي مرتبه في الشهر, ممكن يوصل مرتب شخص في اليوم, بنزود عليه شغله, و نرمي الزباله في اي مكان في الشارع!!!
اعتقد بقي يا جماعة كفاية كده,,
منكونش سبب في شقاء الناس دي, و احباطهم, و شعورهم بالذل
كفاية انهم مش مقدرين من الدولة, و مرتباتهم لا تصلح لاي انسان
ساعدهم, مش بفلوسك, لكن باحترامك ليهم, و اوعي ترمي حاجة في الشارع من النهاردة
يا رب يكون المعني وصل....