التمثال..حامد زيد.
عفا الله عن خطا غدر الخناجر والضلوع ابطال
= بسامح واتركك تحت الظلام الحالك لحالك
دخيلك وفر دموعك ترى هدر الدموع اذلال
= وترى ما فيه احد يصبر مثل صبري بغربالك
انا عيب علي أنقض كلامي والرجال أفعال
= واذا قلت اقطع احبالك تراني بقطع حبالك
عشان اكسب هدب عينك تجرعت العذاب اشكــال
= وليتك ترأف بحالي علشان ارأف بحالك
مسوي في حياتي شي ما يذكر ولا ينقال
= حشا حتى العدو وهو العدو ما يعمل اعمالك
تمسيني على الهم وتصبحني على الغربال
= تقلطني فناجيلك وتقصر عني دلالك
تحملت التعب لجلك وانا حملي يهد جبال
= رحلت من العذاب وما وقفت الا على جالك
علامك كل ما جيك متواضع جيتني تختال؟
= معاك اليا متي بصبر وصبري معك يحلالك؟
مثل ما اقبلت لعيونك لزوم تلد لي باقبال
= ومثل ما قد حشمتك حس واحشم قلبي اشوى لك
أنا محدن بجابرني أساير معك هالمنوال
= ترى لاني تبيع لك ولا ني باصغر عيالك
أنا جيت اعشقك نبض ومشاعر ما اعشقك (تمثال)
= أنا جيت اسكنك واحياك وابقى فيك وابقى لك
أنا جيت بظما عاشق تعب يطرد سراب اللال
= أنا جيت استفز رضاك من فرقاك والجالك
أنا ما همت بك عاقل أنا كنت اعشقك بخبال
= أنا ما كنت احبك حي أنا كنت اعشقك هالك
تخيل من كثر ما اخاف تلقى للزعل مدخال
= أخاف اخطي على طيفك وادوس برجلي ظلالك
تبعتك والعرب تتبع رعود البارق الهمال
= وانا شفت المطر يتبعك في حلك وترحالك
كأن اللي خلق حسنك خلقني مع جسدك ظــلال
= وصرت اقرب جسد يمشي معك باقفاك واقبالك
أبي قلبك يحس انه فقد بمحبته رجال
= ملكته من هدب عين وخسرت رضاه باهمالك
صحيح ان الفراق اقسى ولكن الوصال محال
= أنا صعبن علي أرضي غرورك واضعف قبالك
بعد ما حققت عيني فبعدك للرقاد آمـال
= أعود للسهر؟ يا خوي فــال الله ولا فــالك!
ببدل نظرتك فيني واجي لك كل يوم بحال
= بكون اقرب من ثيابك عليك ولا تهيا لك
بالمك وانثرك واجمعك وارجع وانثرك باهمال
= بخونك وازعلك وارضيك وازعل منك وارضى لك
أبرسم بالثرى وجهك وابدفن صورتك برمال
= أبشكي للعرب فرقاك واضحك عند عذالك
أبهديك الوصال فراق واهديك الفراق وصال
= بسوي مثل ما شوفك تسوي وافعل افعالك
عشان تعرف من فينا الزعول ومن وسيع البال
= أبيك تذوق فنجالي وانا بذوق فنجالك
نصيحة واحتفظ فيها قصر معك الزمن أو طال
= أبي تسمع كلامي زين وتحطه على بالك
اذا حبك هبال اطفال لك عندي هبال أطــفال
= ولا وابشر بعد بهبال حــب ما هو بهبالك
واذا قصدك تهين اسمي عشان تشمت العذال
= ترى لا انته ولا غيرك ولا عشــرة من اشكالك
الــــحــــلـــــم
بوقت من البطا،وبليل تتراقص شياطينه
بعد شفت الضيا ينزع من ثياب المسا ثلثين
تحايلت المنام اللي مثل بيتك تمرينه
وانا اللي من تفارقنا وأنا ماغمضت لي عين
غريبة!!كل حلم يمر برقادي تزورينه
والاغرب كيف أحلم الحلم،وارجع واحلمه بعدين؟
قبل يومين،شفتك بالمنام..وقمت من حينه!
ونمت أمس،ورجع نفس المنام اللي قبل يومين
أنا اللي قبل اسافر شلت قلبي من شرايينه
تركته في يدك مثل الأمانه ،واحفظيها زين
ترى حفظ الأمانه دين..مجبورة تردينه
أجل ، مافيه أحد كد قال لك(حفظ الأمانة دين)؟!
مرد المقفي بيلفي..ويستوفي ،وتوفينه
بعد ليله ،ثلاثه،أربعه،عشره،شهر، شهرين
اذا انتي ،ماانتي بقد الكلام اللي تقولينه
حرام..استامنك حاجة،وإذا جيت اطلبك تنسين
تخونين،وتبين أرضى.!وأحد يرضى تخونينه
أنا لاجيت أخونك، مع حبيبة ثانيه،ترضين.؟
من أول مارجعت من السفر ماشفت لك بينه؟
وأنا اللي كنت أحسبك قبل ادوس ارض المطار..تجين
تكونين أنتي أول شخص عيني تحتضن عينه
وكنت أتخيلك من زود فرحة رجعتي..تبكين
وأشوف بدمعتك حكيك..وأعرفه قبل تحكينه
واجيب أحلى من اللي بتحكينه،وأتركك تحكين
تقولين:الوطن نور..وأقول بنورمضوينه
تقولي لي:غديت أحلى،وأقول:عيونك الحلوين
كلام نام بشفاهك..وخفتي لاتصحينه
ذخرتيه لغرام للي ينام...ويترك تصحين
تغانمتي غيابي .. لين رجحتي موازينه
تعلم من يدك لمس الكفوف وعلمك تجفين
وليتك لاقيه به شي..فيني ماتلاقين
مهو بغرور..لكن خابرك مالك أمل تلقين
تغافلك بغلا..والإ الحلا مهو بمن زينه
تزينه الصور ..بس الصحيح ابن الحلال زوين
وأنا ماني بنقاص عنه يوم أنك تبدينه
نصيبي..هو نصيبي لو يسددها من الصوبين
قنوع بمظهري ،والسم مايذبح ثعابينه
على قول المثل ماني حلو..لكني ماني شين
إذا أهداك الزهر مره،فأنا اهديتك بساتينه
وإذا ألهاك بفرح ليله، فانا تهت لبكاك سنين
وإذا استضعفتك أملاكه...وشتتك ملايينه
أنا حتى فتات الخبزة أقسمها معك نصين
طموحي ،بس أجي وأظفر بشي تستحقينه
تدينته ،تسلفته،سرقته ،مومهم منين؟
كأني من كثر ماارضى بكل اللي تمنينه
لو انك تطلبين الله ..يعنيني، بقول آمين
أنا ماالعب على الحبلين،وقت الطيش وسنينه
تبين الحين يوم أني كبرت العب على الحبلين؟
ترى عند البدو بالذات عيب اللي تسوينه
حلاتك لاعشقتي.. تعشقيني ليوم الدين
غرامٍ نسكن ضلوعه .. حشيمه من مجانين
جفا،يجمع معزتنا... ولاعشق يذل أثنين
كثار اللي تحدوني وقالولي تحبينه ؟
امانه .. لاتخليني صغير بعينهم تكفين
لاني كل iiماقالوا (تخون)..اقول: مسكينه
عليك الله وأمانه..علميهم منهوالمسكين
أنا خايف لياطاح الجمل تكثر سكاكين
وأنا ماعاد بضلوعي مكان لطعنة السكين
مثل ماقالواالمكتوب واضح من عناوينه
لو ارحل منك للغربه بسافر من ظلامك وين؟
كفايه..كل حلم يمر برقادي تزورينه
كفاية..من تفارقنا..وأنا ماغمضت لي عين
قبل يومين شفتك بالمنام وقمت من حينه
ونمت أمس،ورجع نفس المنام اللي قبل يومين
تحياتي للجميع