| احساس طفله
الشاعر:: ثـامر شبيب الدقبـاسي
يابنت وجه الخيـر بيّـن ومعـروف لـو ماتكلـم شافـت النـاس خيـره
والوجه الاقشر ماهو بحاجة وصوف يبـان حتـى للعـيـون الضـريـره
من عاش يتبع خطوة المـال ملهـوف رزقٍ كتبـه الله .. مافـيـه غـيـره
الخوف لو ينفع .. نفع صاحب الخوف اللـي علـى حقـه يدينـه قصيـره
الضعف ماغيّر قدر نـاسٍ ضعـوف عاشت صغيره ويوم ماتـت صغيـره
كلمة احبك بس مـن اربـع حـروف وتحكي احاسيـس ومشاعـر كثيـره
الحب اكبر من سهر ليـل وطيـوف ماتفهمـه حتـى القلـوب الكسـيـره
تدرين اصدق حب يطلع من الجـوف حب الفقير اللـي عشـق لـه فقيـره
احلامهم تكبر مـن ملامـس كفـوف وتكبر من اشـواق العشيـر لعشيـره
كنه معاها لو علـى ضلـع مكشـوف داخل قصـر يجمـع اميـر واميـره
احساسهم صادق بلا كـذب وزيـوف كلـن يقـول اللـي يريّـح ضميـره
احساس طفله عندهـا العيـد نفنـوف تظـن مـن تلبسـه صـارت كبيـره
يابنت انا عانيـت ومرتنـي ظـروف ماريّحـت حتـى العيـون السهيـره
وللحين راسي راس وكتوفي كتـوف ماغيّـرت منـي ليـالـي عسـيـره
مدام فينـي حيـل وعيونـي تشـوف والله معيّشـنـي بحـالـه ستـيـره
والله لستقبـل علـى بابـي ضيـوف لو مـا ملـك الا دلتيـن وحصيـره
__________________  |